BR LA UNION – Naipasidong iti kustodiya dagiti otoridad ni PSMS John Mollenido, asawa ken ama dagiti biktima nga isuda PSMS Diane Marie Mollenido ken anak na a ni John Ysmael Mollenido, kas maikapat a suspek iti krimen.
Maibasar iti kumpirmasyon ti Quezon City Police District (QCPD), innala da ni Mollenido kalpasan a nagbalin a person of interest iti kaso gapu iti nagbalin a waragawag ti car agent a mangibagbaga a maysa ni Mollenido kadagiti suspek iti krimen.
Immuna ti daytoy, naarestar dagiti tallo a suspek, nga agpapada a saan pay a nainaganan ken manamnama a maipasidong iti inquest proceedings idi Domingo, Pebrero 1.
Maipalagip a nasarakan a natay ken adda tama iti ulo ni PSMS Diane Marie Mollenido iti maysa a creek idiay Pulilan, Bulacan bayat a kalpasan ti lima nga aldaw, nasarakan met ti bangkay ni John Ysmael Mollenido iti maysa a calamansi farm idiay Victoria, Tarlac ken agparparang iti report nga asphyxia by suffocation iti nakatayan ti biktima.
Agtultuloy ti imbestigasyon ken panangduktal dagiti otoridad iti motibo ti nasao nga insidente.
