Adda a talaga ti FOREVER para ti 79-anyos a lalaki ken ti 67-anyos a girlfriend na kasaruno a naikasar da metlaengen kalpasan ti 32 a tawen a relasyon.
Pinaneknekan da Manuel Delos Santos ken Mae Dolar Baladiang ita a Bulan ti Puso a ti panagayat ket awan iti pilpilien na a panawen. Saan da nga imbasar iti nasapa wenno nabayag la unay iti panagayat idi nagsapata ken naikasar da a dua sadiay Bulwagan Villegas ti Manila City Hall.
Naimatangan dagiti empleyado ti city hall ti Maynila, babaen ti panangidaulo ni Mayor Francisco ‘Isko’ Moreno Domagoso, iti selebrasyon ti panagkallaysa dagiti dua.
Segun iti groom, nupay dekada dan nga agkadwa ket kasapulan latta iti pasensya kas paset iti relasyon, bayat a naragsak met nga inbinglay ti bride a natungpalen ti nabayag nan nga arapaap, kadwa ti lalaki nga umno a mangtartaripato kenkuana.
Mensahe ni Mayor Isko a ti kwento da Manuel Delos Santos ken Mae Dolar Baladiang ket pakapidutan kuma iti adal maipapan ti panagbigbig ken panangipateg iti kasar.
