Pinasingkedan ni House Deputy Majority Leader Gil “Kabarangay Jr.” Acosta a repasuen nga umuna ti House Committee on Justice iti porma ken linaon ti dua nga impeachment complaints kontra kenni Bise Presidente Sara Duterte sakbay da nga agtignay.
Segun kenni Acosta, masapul a dumalan ti nainget a panangtingiting dagiti reklamo, karaman iti affidavit ti sigud nga aide ti Bise a ni Ramil Madriaga a nausar kas basaran iti kaso.
Iti maysa a media forum, inwaragawag ni Atty. Raymund Palad, ti abogado ni Madriaga, a nakasagan a sumango ti kliyentena iti Kamara, Senado, wenno Ombudsman no mapaayaban isuna babaen ti subpoena.
Impaganetget ni Palad nga iggem da dagiti tallo a mobile phones ni Madriaga a maipagarup a naglaon dagiti napapateg nga ebidensia.
Nakasagana met isuda nga ipasidong dagitoy iti forensic examination tapno mapaneknekan dagiti alegasion ti iregularidad iti pondo ken relasion kadagiti sumagmamano a personalidad.
Iti salaysay ni Madriaga, inramanna ti nagan da Michael Yang, sigud nga adviser ni sigud a Presidente Rodrigo Duterte, ken ni Ling Wei Xiong kadagiti transaksion ken panagdelivery ti kuarta.
Nupay naammuanda laeng manipud kadagiti damag a nausar iti affidavit ni Madriaga iti impeachment, impanamnama ti kampona a nakasaganada a mangiparang kadagiti electronic records no maingato ti panagusig iti kaso.
Idi Biernes, pinasingkedan ni House Secretary General Atty. Cheloy Garafil a naitransmit dan iti Office of the Speaker ti dua nga impeachment complaint a naipila kontra kenni Bise Presidente Sara Duterte.###
