Agparparang kadagiti dokumento nga inruar ti United States Department of Justice (DOJ) a maipagarup a nangtangdan ti pimmusay a sex offender a ni Jeffrey Epstein iti maysa a team a nakabase ditoy Pilipinas tapno ikkaten ken akkuban dagiti negatibo nga impormasion maipapan kenkuana iti Internet.
Maibasar daytoy kadagiti dokumento a nakalap ti Estados Unidos, karaman dagiti panagsinnukat ti email iti nagbaetan da Epstein ken Al Seckel, nga asawa ti kabsat ni Ghislaine Maxwell — iti sigud a kaayan-ayat ken ti kangrunaan a kadua ni Epstein iti panangala kadagiti menor de edad.
Nasentensiaan ni Maxwell idi 2021 mainaig kadagiti sex trafficking crimes ni Epstein.
Kadagiti email, inladawan ni Seckel iti maysa nga organisado a kampania tapno ilemmeng iti maipagarup a krimen ni Epstein kadagiti online search results, karaman iti panagaramid dagiti positibo a link maipapan kenkuana.
Iti maysa pay nga email idi Disiembre 7, 2010, imbaga ni Seckel kenni Epstein a naikkaten dagiti Google search suggestions dagiti termino a “Jeffrey Epstein Jail” ken “Jeffrey Epstein Pedophile,” a maipagarup a trinabaho ti maysa a Philippine-based team.
Segun kadagiti dokumento ti U.S. DOJ, nangaramid iti grupo ti ado a website ken web pages a mangipakpakita kenni Epstein kas maysa a philanthropist, mangponpondo kadagiti proyekto mainaig iti siensia, ken uray pay iti isports.
Naamuan a dagitoy nga pages ket napagsisilpo babaen kadagiti rinibo a links tapno manipularen iti resulta dagiti search engines.
Inbatad pay ni Seckel a napateg iti panang-edit iti biograpia ni Epstein iti Wikipedia page.
Iti maysa nga email idi Disiembre 16, 2010, kenunana nga “important victory” iti panangkontrol ti linaun daytoy gapu ta isu ti kanayun a rumrumuar kadagiti search results iti internet.
Maipalagip a naarestar ni Jeffrey Epstein idi 2019 gapu iti kaso a sex trafficking ken panangabuso kadagiti menor de edad idiay Estados Unidos ken dadduma pay a pagilian. Maipagarup a pimmusay isuna kabayatan a nakakulong idiay New York jail iti kapada a tawen bayat nga ur-urayenna ti proceedings.###
