Inaprobaran ken inamiendaran ti Senado iti Senate Resolution No. 256 a mangkonkondenar kadagiti waragawag ti Chinese Embassy ti Manila kontra kadagiti opisyales ken institusyon ti Pilipinas seknan ti panangdepensa ti soberanya kadagiti mapagsusupiatan a teritorio.
Nupay natantan ti interpelasyon ti minorya, naaprobaran latta daitoy kamaudiananna nga awan iti panagkontra.
Segun iti resolusyon a pirmado dagiti 15 a senador, naglabsing iti diplomatiko a galad dagiti waragawag iti Chinese Ambassador ken addaan iti panggep a butngen wenno rugitan dagiti pang-seguridad nga institusyon ti pagilian.
Impaganetget ti Senado nga adda ti karbengan ken responsibilidad ti Pilipinas nga isakit ti soberanya ken interes kas maiyannurot iti international law, ken pinaregta ti DFA a mangisayangkat ti diplomatiko nga addang.
Dagiti nagpirma iti Senate Resolution No. 256 ket isuda Senate President Vicente Sotto III, Senate President Pro Tempore Panfilo Lacson, Senate Majority Leader Juan Miguel Zubiri, Senador Bam Aquino, Senador JV Ejercito, Senador Jinggoy Estrada, Senador Sherwin Gatchalian, Senadora Risa Hontiveros, Senador Lito Lapid, Senador Loren Legarda, Senador Francis Pangilinan, Senador Senador Erwin Tulfo, Senador Raffy Tulfo, Senadora Camille Villar, ken Senador Mark Villar.
