Kinarit ni ACT Teachers Partylist Rep. Antonio Tinio iti Palasyo ti Malacañang nga agbalin a silulukat maipapan iti estado ti salun-at ni Presidente Ferdinand Marcos Jr.
Inaramid ti mamanday-linteg iti waragawag, sumagmamano a lawas kalpasan a ma-confine iti Presidente gapu ti diverticulitis, maysa a klase ti digestive illness.
Iti panakiuman ti Bombo Radyo kenni Rep. Tinio, inallukoy na iti Palasyo nga agbalin a silulukat ken ilawlawag iti publiko ti pudno nga health condition ni Presidente Marcos agsipudta pagrebbengan daytoy ti Malacañang.
Karbengan met ti publiko a maamwan nu ‘fit’ isuna nga agbalin kas lider ti pagilian ken nu kabaelan na pay iti agaramid ti desision mainaig iti trabaho na kas Presidente.
Innalukoy met ti Makabayan lawmaker iti Palasyo a saan nga idulin ti agpayso a diagnosis wenno natakuatan dagiti doktor idi na-confine ti manu nga aldaw ni PBBM nu sadinno napansin ti publiko iti panagkuttong na.
Maipalagip nga idi rabii ti Enero 21, 2026 ket naipasidong ni Pres. Marcos iti medical observation kalpasan a makapadas iti panagsakit ti tiyan.
Enero 26 met idi inpadamag ti Malacañang a nagsubli isunan iti normal a trabaho kagiddan iti panagsayaat ti kondisyon daytoy.
