BR LA UNION – Inlawlawag ti abogado a ni Atty. Ferdinand Topacio a saan da a tarigagay a pagulimeken ni Senate President Vicente ‘Sotto’ III iti panagkumento na seknan iti isyu ti ‘impeachment’ kenni Vice President Sara Duterte.
Segun iti nasao nga abogado, ti panangidatag da ti petisyon idiay Korte Suprema ket saan a ranta nga usaren tapno pagulimeken iti mammanday linteg.
Kinuna na a nawaya ni Senador Tito Sotto III a mangipeksa ti opinyon na, saan laketdi a mailabsing iti maaw-awagan a ‘rules on contempt’.
Impaganetget na pay a ti Kangatuan a Pagukuman ket maiparbeng nga ipaayan ti ‘respeto’ manipud kadagiti sanga ti gobyerno.
Imbaga pay ti abogado a saan a mabalin a bastusen lattan iti Korte Suprema agsipudta saan na met a bas-bastosen ti kongreso.
Innayon ni Atty. Topacio nga awan dagitoy iti lugar a mangpakdaar iti siasinoman a lehislador mainaig iti panagsao wenno panangyebkas iti opinyon da.
Kinunada nga ipakpakitada laeng a saanda a kayat dagiti balikas a saan a mangraem wenno mangtagibassit iti Korte Suprema.
Maipalagip nga idi kalman nangipilada iti petition for indirect contempt kontra kenni Senate President Tito Sotto III, a mamatida a saan a maakseptar dagiti nabiit pay a komentona.
Partikular a dak-dakamaten da ti panangbusor ti mammanday-linteg iti resolusyon a nangikkat iti ‘articles of impeachment’ maibusor iti bise presidente.
No ipalubos ti Korte Suprema ti petision, mabalin a mamulta ni Sen. Sotto iti 30,000 pesos ken maibalud iti 6 a bulan.
