Pinasingkedan ni Department of Justice Spokesperson Atty. Polo Martinez a ‘submitted for resolution’ iti reklamo a ‘malversation’ a sangsanguen ni sigud a Senador Bong Revilla Jr.
Repasuen wenno adalen ti prosekusion iti pending resolution tapno maammuan no ania ti maaramid nga addang iti reklamo.
Posible a rummuar iti resolusion ken ti desision a maipila kas kaso wenno maibasura ken saan a maingato iti korte.
Inbinglay pay ti tagapagsarita a ti ‘malversation case’ kontra iti sigud a senador ket mainaig iti maanomalya a proyekto a konektado iti kumpanya nga SYMS Construction Trading.
Ti reklamo ket paset iti umuna a batch ti ‘lima a kaso’ a naipila iti Department of Justice ken tallo kadagitoy ti agdama a ‘pending for release’ bayat a ‘pending review’ iti ‘malversation complaint’.
Awan pay ti espesipiko a petsa nga inbinglay ni Atty. Martinez no katno a rumuar iti pinal resolusion ti prosekusion mainaig iti reklamo.
Idi Enero 12, agdama a tawen, ‘submitted for resolution’ iti malversation case kontra iti sigud a mammanday-linteg.
Ti opisial a ‘timeline’ ket 60 nga aldaw manipud iti pannakaipila ti reklamo sakbay nga iresola ti prosekusion.
Inlawlawag ti tagapagsarita a saan a naggigiddan a naisubmitir iti departamento dagiti kaso a mainaig iti korapsion iti flood control.
Kinunana dagiti tallo a batch a simmangpet iti Department of Justice ket addan ti nagduduma nga oras ken petsa ti panagipila.
Sangsanguen ni sigud a Senador Bong Revilla Jr. ti nagtutuon a reklamo ken kaso – saan laeng nga iti Department of Justice no ket karaman pay iti dadduma a korte.
Iti biang ti DOJ, sumangsango ni Revilla dagiti reklamo a ‘malversation’, pakairamanan ti ‘plunder case’ gapu iti mapapati a pannakairamanna iti flood control corruption.
Iti agdama, adda isuna iti kustodia ti Bureau of Jail Management and Penology ken nakadetine iti New Quezon City Jail idiay Payatas, Quezon City.###
