Nagpanawagan ni sigud nga House Speaker ken Leyte Representative Martin Romualdez a dagus nga ipasa ti House Bill No. 7227 wenno OFW Hospital Act, nga addaan panggep a maipasdek ken pagbalinen a linteg ti Overseas Filipino Workers (OFW) Hospital kas panangbigbig iti sakripisio dagiti naawagan kas “moderno a banuar ti pagilian”.
Segun kenni Romualdez, ti addang ket tapno masigurado ti dekalidad ken mapangnamnamaan a serbisio pangsalun-at para kadagiti OFW ken ti pamilyada.
Panggep ti singasing a mangipasdek ti Level III hospital idiay San Fernando City, Pampanga ken direkta nga adda iti sidong ti Department of Migrant Workers.
Saklaw ti singasing iti komprehensibo a serbisio-medikal para kadagiti OFW-sakbay a pumanaw ti pagilian, kabayatan nga adda iti kontrata, ken panagsubli iti Pilipinas.
Karaman ditoy ti 24/7 telehealth services, medical examinations sakbay ken kalpasan ti employment, ken panagbalin referral hospital dagiti na-repatriate nga OFW.
Mangipaay met iti ospital ti serbisyo kadagiti rehistrado a miembro ti Overseas Workers Welfare Administration (OWWA) kadua dagiti legal dependent, ken dadduma pay a pasyente no adda ti naan-anay a kapasidad.
Segun ti Acidre, panggep ti singasing nga aramiden a napaut ken sistematiko iti serbisio pangsalun-at para kadagiti OFW, ken saan laeng a temporario a sungbat kadagiti isyu.
Ti inisial a pondo para ti implementasion ket agtaud iti maiyannatip nga ahensia ti gobierno ken mairaman iti tinawen a General Appropriations Act no agbalin a linteg.###
