Pinasingkedan ti Department of Migrant Workers (DMW) nga awan ti Pilipino a nasugatan wenno nakaro a naapektaran iti agtultuloy a rinnupak idiay Middle East, kasaruno iti insayangkat nga airstrike ti America ken Israel idiay Iran.
Segun kenni DMW Secretary Hans Cacdac, nagtaripnong dagiti opisial ti Pilipinas kadua dagiti embahador ken labor attaché iti rehion tapno masigurado iti kinatalged dagiti Overseas Filipino Workers (OFWs) ken dagiti empleyado ti gobierno.
Nakalatag iti contingency measures ti ahensia kas iti panangpasigurado a nakasagana iti supply ti makan, danom, ken dagiti temporario a pagnaedan para kadagiti apektado a kailian. Adda metten dagiti plano para iti natalged a transportasion ken panangpaawid no kaspangarigan kumaro iti sitwasion.
Aktibo met a sungbatan ti ahensia iti damag dagiti pamilya nga adda ditoy pagilian maipapan iti kasasaad dagiti kabagyanda ken dagiti aberya ti panagkanselar dagiti flights.
Iti agdama, agtaltalinaed a naka-full alert dagiti embahada ti Pilipinas idiay Tehran ken Tel Aviv kas maitunos iti direktiba ni Presidente Ferdinand Marcos Jr. tapno bantayan iti kinatalged dagiti Pilipino iti kangitingitan dagiti kumarkaro a tensyon iti rehion.###
