BR LA UNION – Impaganetget ni Representative Francisco Paolo Ortega V idiay Kamara a nasken a maiproseso iti sumaruno nga addang ti maika-uppat nga impeachment complaint kontra kenni Vice President Sara Duterte kalpasan a naideklara a “sufficient in form”.
Iti panagdengngeg ti House Committee on Justice nga idualwan ni Atty. Gerville “Jinky Bitrics” R. Luistro, pormal nga inprisinta ni Ortega iti maaw-awagan a Cabrera complaint.
Kadwa na ni Rep. Bienvenido Abante Jr., impasa da iti Resolution of Endorsement idi Pebrero 18, 2026 a sinapataan iti sango ni Secretary General Atty. Cheloy Velicaria-Garafil.
Impaganetget ni Ortega, iti reklamo nga indatag ni Atty. Nathaniel Cabrera ket duly verified ken duly notarized.
Maipagarop a pasado daytoy iti Rules of Procedure in Impeachment Proceedings ti komite agsipudta nalawag a dagiti akusasyon ket maibasar iti personal knowledge ken authentic documents.
Segun iti mammanday linteg, panawenen tapno agsingir iti sungsungbatan dagiti opisyal ti gobyerno anyaman ti burik da iti pulitika.
Daytoy ket iti tengnga ti sangsangwen ita ti bise presidente a seryoso nga alegasyon ti culpable violation of the Constitution, betrayal of public trust, graft and corruption ken dadduma pay a nadadagsen a krimen a mangdad-dadael iti integridad ti institusyon.
Sinubliyanan pay ni Ortega iti panagsapata ti bise presidente, dandani uppat a tawenen iti napalabas, a maipagarop a saan met a natungpal.
Gaputi dagsen dagiti alegasyon ken kaadda ti umdas a naisumite a dokumento, pormal a kiddawen ti kongresista iti komite a palubosan a magna ti proceedings iti sumaruno a proseso tapno rumwar ti kinapudno.
