BR LA UNION – Inwaragawag ni House Justice Committee chair Gerville Luistro a mabalin nga ileppas ken madesisyunan iti uneg laeng ti dua a bulan dagiti reklamo nga impeachment kontra kenni VP Sara Duterte, manipud panangirugi ti trial proper.
Mangrugi ti panagdengngeg apaman a maisumite amin a responsive pleadings, sungbat ti Bise Presidente iti uneg ti 10 nga aldaw, sungbat dagiti complainant iti uneg ti tallo nga aldaw, ken rejoinder ti kampo ni Duterte iti uneg ti tallo nga aldaw.
Kalpasanna, i-determina ti komite nu adda naan-anay a basaran tapno ilungalong ti panagdengngeg, ket mabalin a mang -isyu ti subpoena ken imbitaran dagiti testigo.
Kalpasan ti hearing proper, pagbobotosan iti panel nu adda probable cause a maisagpat ti kaso idiay plenaryo.
Kasapolan ti botos a saan a bumaba iti 105 a mammanday linteg tapno ma-impeach iti Bise Presidente.
Nakailanad kadagiti reklamo iti maipagarop a betrayal of public trust ken culpable violation of the Constitution gapu iti maipagarop a biddut a panangusar ti P612.5 milyon a confidential funds ken panangipangta kenni President Ferdinand “Bongbong” Marcos Jr. ken pamilya na.
Segun kenni Luistro, mabalin nga itultuloy ti panagdengngeg nga uray recess tapno mapapartak iti proseso.
