BR LA UNION – Agsagsagana ti Land Transportation Franchising and Regulatory Board (LTFRB) para iti pannakaiwaras ti fuel subsidy kadagiti driver ken operator ti public utility vehicles (PUV).
Daytoy ket kagiddan ti manamnama a panagngato ti presyo dagiti produkto a petrolyo ken namnamaen pay a mapasarunwan iti sumarsaruno nga aldaw.
Segun kenni LTFRB Chairperson Vigor Mendoza, karaman iti panagsagana ti koordinasyon kadagiti organisasyon ken kooperatiba tapno maipakaammo kadakuada dagiti kasapulan, apaman a mangrugi ti pannakaiwaras ti nasao a tulong.
Siguraduen ti opisina nga adda umdas ken maitutop a dokumentaryo a kasapulan tapno dagus a maipatulod ti pondo kadagiti benepisiaryo apaman nga addan ti go signal a rugyanen ti rollout ti fuel subsidy.
Tarigagay ti LTFRB a siguraduen nga amin nga operator ket addaan ti card a pakai-downloadan ti fuel subsidy babaen ti state-operated ken government-owned bank a LandBank.
Ita a tawen, agarup P2.5 billion ti inlatang ti Department of Transportation (DOTr) para iti programa na a fuel subsidy. Manamnama a maiwaras daytoy kadagiti amin nga adda iti sektor ti pampubliko a transportasyon.
Marugyan ti panagibunong ti fuel subsidy nu umabot iti $80 per barrel iti presyo ti langis iti sangalubongan a merkado.
