Kinontra dagiti labor groups ken negosyante iti 4-day work week dagiti ahensya ti gobierno a nagbalin nga epektibo ita nga aldaw, Marso 9.
Segun kenni Santiago Dasmariñas Jr., presidente ti Confederation for Unity, Recognition and Advancement of Government Employees, nupay sumagmamano kadakuada iti pimmabor ti kellaat a direktiba, para ti pakabuklan ket saan na met a masungbatan ti pudno a pagkasapulan dagiti empleyado ti gobierno.
Kinunana a napaay ti polisiya ni Presidente Ferdinand Marcos Juniro nga ikonsidera ti minilyon a job order ken Contract of Service Workers (COSW) iti gobierno a “no work, no pay” policy iti masursurot ken isu ti kangrunaan a marigrigatan kadagiti panawen ti krisis.
Maibasar ti datos manipud Civil Service Commission (CSC) idi napalabas a tawen, nasurok 900K ti bilang dagiti job order workers ken contract of service workers iti gobierno ditoy Pilipinas.
Impaganetget ti labor group president nga ad-adda a kasapulan ita dagiti mangmangged ken umili ket ti economic relief ken proteksyon a mabalin a maaramid babaen ti temporario a panangikkat ti excise tax kadagiti produkto ti petrolyo ken value-added tax kadagiti tagilako ken serbisyo.
Impunto met ni Kilusang Mayo Uno chair Jerome Adonis a mabalin nga agtungpal ti doble wenno triple ti bannog dagiti empleyado nu uppat nga aldaw laeng makalawas iti serrek ngem dumanon met ti 12 nga oras iti trabaho.
Kabayatanna, imballaag ti kadakkelan a grupo dagiti negosyante a Philippine Chamber of Commerce and Industry a mabalin nga ibatog ti nasao a polisiya iti pagkasapulan dagiti industriya.
