Silulukat iti Malacañang nga adalen ti singasing a “4-day work week” kas paset kadagiti addang ti panagtipid iti kangitingitan ti manamnama nga epekto ditoy Pilipinas ti kumarkaro a tensyon ti nagbaetan ti Iran ken Israel.
Inlawlawag ni Palace Press Officer Claire Castro nga iti agdama ket awan pay ti pormal a diskusyon seknan iti topiko, nupay nakasaganan ti gobierno nga adalen ti singasing apaman agsaknap pay ti gyera idiay Middle East.
Maipalagip a naipatungpalen idi COVID-19 pandemic iti 4-day work week ken work-from-home arrangement kadagiti dadduma nga ahensya.
Kabayatanna, nadakamat met ni Presidente Ferdinand Marcos Junior nga adda iti direktiba nan kadagiti ahensya ti gobierno ken ti publiko a mangipatungpal kadagiti addang ti panangsalimetmet ti enerhiya.
Nagpanawagan met ni Paranaque Rep. Brian Raymund Yamsuan iti temporario a pannakaipatungpal ti work-from-home setup ken online classes tapno bumassit ti epekto ti panagngato ti presyo dagiti kangrunaan a pagkasapulan, partikular ti langis.
Innayon na nga umuna a maapektaran ti sektor ti transportasyon, a mabalin a mangigubuay ti kanayunan a babayadan para kadagiti umili a marigrigatanen ti agdama a presyo ti banag-banag.
Mainaig kadaitoy ket ngimmato payen ti presyo ti krudo ti sangalubongan a merkado iti $82.57 kada bariles, kasaruno ti pagdandanagan a panangipaserra ti Iran iti Strait of Hormuz a pagdaldalyasatan ti kadakkelan a supply ti langis ditoy lubong.
