BR LA UNION – Simmadsad iti balor ti piso iti baro a record-low a P59.87 kada dolyar idi kalman, Lunes, kagiddan ti agtultuloy a panagpigsa ti US dollar sakbay ti nakatuding a panagtataripnong ti Federal Reserve.
Daytoy iti maikapat a nagsaruno nga aldaw a kimmapoy ti piso kontra dolyar, a nanggubway ti panagdanag iti merkado ken iti ekonomiya ti pagilian.
Maibasar iti datos, immabot pay ti intraday low a P59.95 kada dolyar ti exchange sakbay a bimmawi ti bassit.
Ti sigud a kababaan a balor ket P59.735 kada dolyar a nailista idi Marso 13, 2026.
Ti panagpigsa ti dolyar ket gapwanan ti manamnama a basbassit a rate cuts ti Federal Reserve ita a tawen, kagiddan ti agtultuloy a tensyon idiay Middle East a nangiduron kadagiti agpupuonan a pimmabor iti dolyar.
Kinumpirma ni Bangko Sentral ng Pilipinas (BSP) Governor Eli Remolona Jr. nga adda interbensyon iti BSP tapno lapdan iti piso a lumbes iti P60 kada dolyar.
Idi Enero, impaganetget ni President Ferdinand Marcos Jr. a tarigagay na a maliklikan a dumanon ti piso iti P60 kada dolyar gaputi epekto na iti pang-nasyunal nga utang.
Iti panagsuwek ti piso ket addaan ti nalawa nga implikasyon: ngumato ti balor ti national debt a nakabase iti dolyar, posible a mangigubway ti panagngato ti presyo dagiti imported a produkto kas ti langis ken taraon, ngem mangipaay met ti dakdakkel a balor iti remittances dagiti Overseas Filipino Workers (OFWs).
Patta-patta dagiti traders nga aggaraw ti piso iti baetan ti P59.70 agingga P59.95 kada dolyar iti sumarsaruno nga aldaw, bayat nga agtultuloy nga agbantay iti BSP tapno mantiniren iti kinatibker ti piso.
