Nagsuwek iti baro a kababaan a tukad iti pakasaritaan ti piso ti Pilipinas kalpasan a nagrikep iti P63.06 kontra dolyar iti panagleppas ti kalakalan ita nga aldaw, Oktubre 15.
Iti intraday trading, lalo pay a simmadsad iti balor ti piso iti P63.15 kada dolyar, nababbaba ngem iti sigud a record low a P62.90 idi Oktubre 8.
Namnamaen a ti panagkapsot ti piso ket mangparnuay iti nangat-ngato a gastos iti panagangkat ti langis ken produkto a petrolyo ken mangiduron pay iti panagngato ti inflation wenno presyo dagiti gagatangen ditoy pagilian.
Malaksid dayta, makaapektar pay iti depresiyasyon ti piso iti nasyunal nga utang ti Pilipinas, a ti maikatlo a paset daytoy ket agtataud iti gangannaet nga agpapautang.
Nupay apagbiit nga agnumar iti pamilya dagiti overseas Filipino workers (OFWs) gapu iti mas nangatngato a kaibatugan ti piso iti remittance dagitoy, mabalin met a maapektaran latta iti bukod da a kabaelan a gumatang gapu iti panagngato dagiti gagatangen.
Sipud nangrugi ti tensyon ken panagraut ti US ken Israel kontra Iran idi maudi a paset ti Pebrero, nagsuwek ti 9.4 a porsyento wenno P5.395 iti balor ti piso kontra dolyar.
