BR LA UNION – Siniguro ni President Ferdinand Marcos Jr. nga agtalinaed a natibker ti takder ti gobyerno iti national defense, kagiddan iti panangpa-pigsa ti papel ti Philippine Army iti external defense babaen ti Comprehensive Archipelagic Defense Concept.
Inaramid ti Presidente iti waragawag iti panagdar-ay na iti maika-129 a founding anniversray ti Philippine Army idi kalman, Marso 19.
Segun iti Presidente, tarigagay na a padur-asen pay ti kabaelan ti puwersa armada iti external security operations bayat nga in-inut a maiyakar iti pokus manipud internal security operations.
Siniguro pay ti Presidente, nga agtultuloy a mapapigsa ti kabaelan ti Armed Forces of the Philippines (AFP) tapno masungbatan dagiti baro a pangta, kabilang iti seguridad iti kabaybayan ken cyberspace.
Kinuna na a napateg ti pannakitinnulong kadagiti ahensya ti gobyerno para iti mas epektibo nga implementasyon ti internal ken external defense.
Suportado ti Presidente iti agtultuloy a modernisasyon ti militar ken programa iti kinakapya iti komunidad, kabilang dagiti inisyatibo ti Department of National Defense ken National task Force to End Local Communist Armed Conflict.
Binigbig pay ti Presidente iti kinabanwar ken dedikasyon dagiti suldado iti panangpatalinaed ti kinakapya ken seguridad ti pagilian.
Rinaem pay ti Presidente dagiti pammadayaw a nagun-od ti Philippine Army, ken pannakitinnulong na iti Department of Science and Technology para kadagiti kabarwanan a proyekto pangdepensa.
Inallokoy ti Presidente dagiti suldado nga itultuloy iti integridad, disiplina, ken propesyonalismo iti serbisyo, kagiddan iti tarigagay a magun-od iti maysa a natalged ken nadur-as a “Bagong Pilipinas.”
