Nakita manen iti Philippine deer wenno ‘Rusa marianna’ idiay probinsia ti Marinduque kalpasan ti sumagmamano a dekada a panamati nga awanen daytoy iti nasao a lugar, segun ti Department of Environment and Natural Resources (DENR).
Iti palawag ti ahensia, pinasingkedan ti Marinduque Wildlife Sanctuary Protected Area Management Office iti kaadda ti saan a bumaba ti 10 a Philippine Deer idiay Barangay Makulapnit.
Adda met dagiti tugot ti saka a nasarakan idiay Boac ken asideg a lugar, a mangpaneknek nga agtultuloy iti panagraira ti nasao nga species iti isla.
Segun ti DENR, ti panagparang manen ti ugsa ket resulta ti nagtipon a panagregget ti MIMAROPA regional office ken ti Provincial Environment and Natural Resources Office idiay Marinduque.
Maibilang daytoy a napateg a gapuanan iti konserbasion.
“The reappearance of the Philippine deer in Marinduque stands as both a conservation milestone and a call to action—demonstrating that while recovery is possible, sustained partnership is essential to ensure its long-term survival,” segun ti DENR.
Nupay kasta, nagpakdaar iti ahensia nga agtaltalinaed iti peggad ti species gapu ti illegal hunting, poaching, ken panagatake dagiti wild dogs.
Kabayatanna, plano ti University of the Philippines Los Baños a mangisayangkat ti panagadal tapno masukimat iti populasyon ti Philippine deer ken mangbukel dagiti addang para iti napaut a panangtaraken kadakuada.###
