Agpaut laengen ti supply ti langis ditoy Pilipinas iti nasurok-kumurang 45 nga aldaw kas maibasar iti datos manipud imbentaryo ti Oil Industry Management Bureau:
Gasolina – 53.14 nga aldaw
Diesel – 45.82 nga aldaw
Kerosene – 97.93 nga aldaw
Jet fuel – 38.62 nga aldaw
Fuel oil – 61.49 nga aldaw
LPG – 23.51 nga aldaw
Nupay kasta, ipaspasigurado met ti Department of Energy (DOE) nga umdas latta ti supply bayat nga agtultuloy ti addang iti gobierno a manayunan ti buffer stock.
Kinuna ni Energy Undersecretary Alessandro Sales nga agtultuloy ti panangipamaysa iti pagtaudan ti supply ti LPG tapno masiguro a saan daitoy nga agkurang.
Para iti panangpapigsa iti reserba ket imbatad met ni Energy Secretary Sharon Garin a babaen ti Philippine National Oil Company (PNOC) ket gumatang ti gobierno ti maysa milyon a bariles iti diesel nga aggatad ti P10B, nga agpaut laeng iti ti agingga makalawas a konsumo.
Iti agdama ket aganay 400K a bariles ti adda iti sidong ti PNOC bayat a manamnama pay ti kanayunan a 140K a bariles sakbay agleppas ti bulan ti Marso.
Maala ti kanayunan a supply kadagiti nagduduma a pagilian, pakairamananen dagiti adda ditoy Southeast Asia.
