BR LA UNION – Simmangpet ti umuna a kargamento ti gobierno nga imported diesel idi kalman, Huwebes, Marso 26, 2026 kas paset ti addang a mangpatalinaed iti suplay ti langis ken manglapped iti epekto ti pabaliw-baliw a presyo iti lokal a merkado.
Segun iti Department of Energy (DOE), nakaawatda iti agarup 22.5 milion a litro wenno 142,000 a bariles a diesel, a paset ti plano a mangpapigsa iti reserba ti enerhiya ti pagilian.
Naaramid daytoy maiyannurot iti direktiba ni Presidente Ferdinand Marcos Jr. babaen ti Executive Order No. 110, a nangipasdek iti Emergency Energy Security Program.
Nairanta ti programa a protektaran dagiti consumers ken industriya kontra iti kellaat a panagngato ti presyo ti langis iti sangalubongan a merkado babaen ti panagnayon iti lokal nga imbentaryo ti gasolina.
Kinuna ni Energy Secretary Sharon Garin nga agtultuloy ti panangmonitorda iti suplay ti lana tapno masiguro a saan a masinga ti transportasyon ken panaglako ditoy pagilian.
Ti panaggatang ken panagi-biyahe ti diesel ket naipatungpal babaen ti tulong ti Philippine National Oil Company ken ti PNOC Exploration Corp., a nabilin a siguradwen iti naannayas a pannakaipatungpal ti nasao a programa.
Target ti gobierno a maka-urnong iti agingga 2 milion a bariles a kanayonan a gasolina kas reserba, nga agserbi a proteksyon kontra iti posible a panagkurang ti suplay.
Iti laksid ti agtultuloy a panaggaraw ti presyo ti langis iti sangalubongan a merkado, impaganetget ti DOE a ti prayoridad ti gobierno ket ti umdas ken agtultuloy a suplay ti diesel, a napateg para iti transportasyon ken agrikultura.
Saan metten nga imbaga ti ahensiya ti pakabuklan a gatad ti shipment, ngem impaganetget ti DOE a napatpateg nga aramiden nga accessible ti fuel para iti publiko iti tengnga ti agdama a pressure iti global oil prices.
