BR LA UNION – Posible a dumanon iti P1,500 ti presyo ti kada 11-kilogram a tangke ti liquefied petroleum gas (LPG) inton bulan ti Abril.
Impakdaar daytoy ti LPG Marketers Association (LPGMA) gapu iti nangato a gastos iti shipping cost gapu iti limitado nga access iti Strait of Hormuz.
Innayon ti LPGMA a binilin ti Department of Energy (DOE) dagiti pribado a sektor nga agtultuloy ti panaggatang iti LPG uray manu ti presyo tapno mataginayon ti suplay.
Immunan nga imbaga ti Department of Energy idiay Senado nga agpaut laengen iti 25 nga aldaw ti LPG stock ditoy pagilian.
Nupay kasta, sigun iti grupo, mabalin nga agpaut ti imbentaryo iti 35 agingga iti 40 nga aldaw.
