Rinugyanen ti Philippine National Police (PNP) iti panangipila ti kaso a kriminal kontra kadagiti indibidual a karaman iti hoarding wenno sobra a panagidulin ti langis ken profiteering wenno sobra a panangipataw ti presyo.
Daytoy ket iti baetan ti posible a krisis iti supply a gapuanan ti agtultuloy a tensyon idiay Middle East ken ti agdama a pannakaipasidong ti pagilian iti state of national energy emergency.
Iti inruar a datos ti pulisya, rumrumuar a lima a kaso ti hoarding ken profiteering kadagiti probinsya ti Eastern Samar, Albay, Masbate, ken Davao del Sur kalpasan a ma-tap iti pulisya tapno tulungan ti Department of Energy (DOE) para iti panangisayangkat ti crackdown.
Immunan nga iningetan ti DOE kadua ti Department of the Interior and Local Government (DILG), dagiti lokal a gobierno, ken PNP iti inspeksion kadagiti gasolinaan tapno malapdan ti hoarding, profiteering, wenno panangmanipula iti supply ti langis.
Iti sidong ti Price Act of 1992, mapatpatawan ti dusa iti hoarding ken profiteering kadagiti basic necessities ken prime commodities, kasta met ti pannakabalud ti maysa agingga 11 a tawen ken multa a ₱5,000 aginggana ₱2 million, depende iti nature ti panagbasol.###
