BR LA UNION – Napinget ti panangbantay ti Department of Health (DOH) iti presyo dagiti agas kasaruno ti agraraira nga oil crisis.
Segun kenni DOH spokesperson ken Undersecretary Albert Domingo, agtultuloy ti monitoring da bayat a mangisay-sayangkat ti dadduma pay nga addang kas ti inventory checks ken contingency planning, partikular kadagiti ospital ti DOH, tapno masiguro a saan a maapektaran ti suplay ti agas ken medical supplies.
Immunan nga imbaga ti DOH nga agtultuloy ti panag-monitor iti presyo dagiti agas ken arwaten, kalpasan nga imballaag ti maysa nga ekonomista a posible a maapektaran ti inflation iti sektor ti salun-at kasaruno ti krisis idiay Middle East.
Innayon pay ni Domingo, kasapolan a siguradwen ti PhilHealth a makagiddan dagitoy iti manamnama a panagngato ti demand iti serbisyo pangsalun-at.
Kabayatanna, inallokoy na iti publiko a nasken a maawatan iti breakdown wenno “unbundling” ti singir kadagiti pribado nga ospital, nangruna iti tengnga ti panagngato ti presyo gaputi inflation.
Innayon na pay a mas maawatan ti publiko iti panagngato ti singir nu nalawag iti breakdown, ken mabalin a tumulong iti DOH babaen ti Zero Balance Billing ken PhilHealth babaen ti umno a benepisyo.
