BACNOTAN, LA UNION – Inyuswat ti lokal a gobierno ti Bacnotan ti kaunaan a “Bacnotan Egg-citing Easter Egg Hunt” idi kalman, Abril 5 idiay Bacnotan Farmers’ Park and Civic Center, a ginasut nga ubbing ti nakipaset iti nabiag a panagbirok kadagiti itlog a naglaon iti nadumaduma a sorpresa ken premio.
Indauluan da Mayor Divine Fontanilla ken Bise Mayor Francis Fontanilla ti nasao nga aktibidad a nairanta a mangpauneg iti pannakaammo dagiti agtutubo maipapan iti kinapateg ti Domingo ti Paskua, bayat a mapatibker ti komunikasion ken pannakilangen kadagiti dadduma nga ubbing babaen kadagiti interactive games ken aktibidad.
Kabayatan ti programa, nabingbingay dagiti nakipaset iti nadumaduma a grupo maibatay iti edadda tapno masigurado ti naannayas ken natalged a panagbirok iti itlog. Naiwaras dagiti namaris nga itlog a naglaon iti kendi, ay-ayam, ken dadduma pay a babassit a sagut iti nadumaduma a paset ti parke, a dagus a nangparagsak kadagiti agtutubo a nakipaset.
Tinabunuan met ni Vice Mayor Francis Fontanilla, Bacnotan Literacy Education and Scholarship Office Head Blanche Encarnacion, ken Bacnotan Youth Development Officer Marc Jandel Buccat ti aktibidad a pangsuporta iti agtultuloy a pannakaipatungpal dagiti programa a naipamaysa iti pagsayaatan dagiti agtutubo.
Malaksid iti panagbirok iti itlog, naitampok pay iti programa ti pannakaiwaras dagiti libre a libro kadagiti timmabuno kas paset ti adbokasia ti lokal a gobierno tapno maitandudo ti kinapateg ti panagbasa ken edukasion iti nasapa nga edad.
Adda pay dagiti dadduma nga aktibidad kas iti simple nga ay-ayam, photo opportunities, ken pannakaiwaras dagiti Easter treats nga ad-adda a nangparagsak kadagiti ubbing ken dagiti nagannakda a timmabuno iti nadakamat nga okasion.
Agtultuloy ti panangitandudo ti lokal a gobierno ti Bacnotan kadagiti gannuat a mangipateg iti panagdur-as dagiti agtutubo babaen kadagiti programa ti edukasion, kagimongan, ken kultura. (Report by Bombo Ericka)
