Nasentensiaan ti innem a bulan a pannakaibalud ti American live streamer a ni Johnny Somali kalpasan a mapaneknekan a nagbasul kadagiti kaso mainaig ti public nuisance ken panangiwaras ti sexual deepfakes idiay Seoul.
Segun iti korte ti South Korea, naglabsing ti 25-anyos a ti pudno a naganna ket Ismael Ramsey Khalid kalpasan a nangipablaak ti video nga ung-ungwenna iti estatua a nangisimbolo kadagiti biktima ti World War II sexual slavery ken nangaramid met dagiti saan a maitutop a kababalin iti nadakamat a memorial.
Kenuna ti korte a paulit-ulit a nakaaramid ti akusado kadagiti bastos nga aramid a nangapektar iti publiko tapno laeng kumita ti kuarta babaen ti online content.
Basbassit daytoy ngem ti kiddaw ti prosekusion a masentensiaan iti tallo a tawen. Malaksid iti pannakaibalud, naparitan met ni Khalid nga agtrabaho kadagiti organisasion a mainaig kadagiti menor de edad ken persons with disabilities iti oras ti pannakawayawayana.
Mabigbigbig ni Khalid gapu iti kontrobersial a contentna kadagiti nadumaduma a pagilian, agraman ti Japan ken Israel, ken inreklamo met dagiti lokal gapu ti panangharass ken panaglabsing iti pampubliko a kinaurnos.
Idiay South Korea, immuna isunan nalapdan a pumanaw iti pagilian bayat a madama ti imbestigasion kadagiti kasona.###
