PUGO, BAUANG– Pimmusay ti maysa a 26-anyos a lalaki kalpasan a nalmes iti kabaybayan ti Barangay Pugo, Bauang, La Union, agarup alas-5:10 ti malem idi Abril 19, 2026.
Nabigbig iti biktima a managan John, maysa a trabahador ken residente ti Bauko, Mountain Province.
Maibasar iti report ti Bauang Municipal Police Station (MPS), dagusda a nagresponde iti insidente kalpasan a nakaawatda iti tawag mainaig iti pannakalmes iti nasao a lugar.
Naammuan iti inisial nga inbestigasion a sakbay ti insidente ket agdigdigus ti biktima iti baybay a kaduana ti tallo a kakabagianna. Bayat ti kaaddada iti danum, kellaat a simmaplit dagiti napigsa a dalluyon. Nadlaw ti maysa kadagiti kabagianna a ni Yves nga iti napigsa nga agos ti nangguyod iti biktima manipud iti igid agturong iti naun-uneg a paset ti baybay, isu a dagus daytoy a nakiddaw ti tulong.
Dagus a nagresponde dagiti otoridad ken rescuers, narekobre ti biktima iti danum nga awan puotna. Pinadas dagiti kameng ti Bauang Rescue Ambulance nga i-revive daytoy babaen ti first aid.
Dagus a naitaray ti biktima iti Ilocos Training and Regional Medical Center (ITRMC) idiay San Fernando City, La Union para iti dagus a medical attention. Nupay kasta, naideklara isuna a dead on arrival idi agarup alas-5:21 ti malem babaen ti attending physician a ni Dr. Casmin Claire Leones.
Makikoordinar pay ti Bauang MPS iti Philippine Coast Guard (PCG), barangay officials, ken iti Bauang Municipal Disaster Risk Reduction and Management Office (MDRRMO) tapno mapapigsa ti panagpatrolia iti aplaya ken masigurado ti kinatalged dagiti agdigus.
Kabayatanna, impalagip manen dagiti otoridad iti panagannad ti publiko no agdigus iti baybay, nangruna no napigsa ti dalluyon ken agos, tapno maliklikan dagiti kapada nga insidente. (Report by Bombo Ericka)
