Inwaragawag ni U.S. President Donald Trump a pinawaywayanna ti ceasefire iti nagbaetanda iti Iran, maysa nga aldaw sakbay ti panagpatinggana, agingga maisubmitir iti proposal a permanente a manggibus iti tension.
Iti Truth Social post ni Trump, imbagana nga iti extension ket gapu iti gobierno ti Iran nga inladawanna kas “seriously fractured” ken kiniddaw daytoy dagiti Pakistani officials.
Sakbayna, imbinglay ti U.S. President iti maysa a TV interview a namnamaen nga ituloyna iti mangbomba iti Iran no saan a magun-od ti Estados Unidos iti katulagan a mangpawayway iti ceasefire agingga ti panagleppas daytoy inton rabii ti Mierkules (Eastern Time).
Dinillaw met ni Mahdi Mohammadi, senior adviser to Speaker Mohammad Bagher Ghalibaf, iti ceasefire extension ni Trump ken inawaganna daytoy nga awan ti serserbina.
Immunan nga indauluan ni Ghalibaf iti umuna a round ti negosasionda iti Estados Unidos idiay Islamabad bayat nga iti maikadua ket idauluan kuma ni Vice President JD Vance no saan a nakanselar, kasaruno iti waragawag ni Trump.
Iti sabali a bangir, kenuna ni Scott Bessent, Treasury Secretary, a mapnon dagiti oil storage idiay Kharg Island kadagiti sumaruno nga aldaw gapu iti agtultuloy a blockade ti Estados Unidos kadagiti barko a sumrek ken rumuar kadagiti sangladan ti Iran, karaman dagiti dadduma pay nga addang tapno pakapsuten babaen ti pinansial a wagas iti rehimen ti Tehran.###
