BR LA UNION – Linapdan ti kaadwan a miyembro ti House Committee on Justice a lukatan ti kahon a naglaun ti tax returns ni Vice President Sara Duterte ken asawa na a ni Atty. Manases Carpio.
Iti binnotosan idi Miyerkules, 38 a miyembro ti nagbotos kontra iti pananglukat ti kahon, bayat nga innem laeng ti pimmabor.
Segun iti Bureau of Internal Revenue (BIR), dagiti nasao a dokumento ket mabalin laeng a lukatan “in aid of legislation” ken iti executive session ngem saan iti public hearing.
Gaputi dayta, agtalinaed a sealed iti kahon nga insumite ti ahensya idi napan a lawas.
Inwaragawag ni Deputy Minority Leader Chel Diokno nga umdasen iti ebidensiya tapno makaituding ti probable cause para iti impeachment ni Duterte nga uray saanen a lukatan ti kahon.
Kinuna na a nasay-sayaat nga urayen iti Senado (kas impeachment court) nga agdesisyon nu lukatan dagiti dokumento, kas panagannad.
Immanamong da Deputy Speaker Janette Garin ken Rep. Benny Abante, ken imbaga da a ti Kamara ket saan pay nga impeachment court, nudiket mangisay-sayangkat laeng ti preliminary investigation.
Binabalaw met ni Senior Deputy Majority Leader Lawrence Defensor iti desisyon ket inawaganna daytoy a “betrayal of public trust.”
Impaganetget na, ti saan a pananglukat ti kahon ket kaiyarigan a panang-kalub ti kinapudno.
Kabayatanna, imbaga ni Senior Deputy Minority Leader Leila de Lima a ti Konstitusyon iti rumbeng nga agpannuray iti anyaman a linteg kas ti National Internal Revenue Code (NIRC), ken saan a rumbeng a limitaran iti bileg ti komite.
