BR LA UNION – Kinumpirma ti Department of Migrant Workers (DMW) a nasugatan dagiti pito a Filipino seafarers kalpasan a natirwan ti mapapati nga Iranian drone attack ti barko da a Maltese-flagged container ship CMA CGM San Antonio.
Segun kenni DMW Secretary Hans Leo Cacdac, amin dagiti pito a Pilipino a tripulante ket nakalasat iti nasao a panagraut ngem nagpasar dagitoy ti dunor iti bagi ken agdama a maipapaayan ti medikal nga atensiyon iti ospital.
Kinuna pay ni Cacdac, uppat kadakuada ket nagsagaba ti minor injuries ngem tallo iti seryoso ti kondisyon na.
Iti agdama, segun kenni Sec. Cacdac, imon-monitor dagiti opisyal ti Philippine Embassy ken labor attaché iti kondisyon dagiti nasugatan a Pinoy ken nakontak metten dagitoy babaen kadagiti hospital authorities.
Napasamak ti insidente bayat nga aglay-layag ti barko idiay Strait of Hormuz, a maikonkonsidera ita kas high risk ken warlike area gaputi tensiyon iti baetan ti US, Israel ken Iran.
