BR LA UNION – Kasapolan ti panag-sakripisiyo tapno maisakad ti panagiskuwela para iti nasayaat a masakbayan ti pamilya, nangruna dagiti annak.
Napateg met ti kommunikasyon kadagiti annak, nangruna nu maiyadayo kadakuada gaputi panag-abroad ti maysa nga ina.
Daytoy ti impaganetget ti maysa nga ina a sigud nga Overseas Filipino Worker a ni Jemma Calica, iti salodsod kenkuana ti Bombo Radyo La Union, nu anya ti maibinglay na a mensahe iti masel-selebraran nga okasyon ita nga aldaw, a Mother’s Day.
Kinuna na a naisangsangayan daytoy nga okasyon, a mangbigbig ti napateg nga akem dagiti inna, kas silaw ti pagtaengan ken agserserbi a giya ti pamiliya.
Imbinglay ni Calica iti biag ken kapadasanna kas ina a nagsakripisyo para iti masakbayan ti pamilyana.
Kinunana a napateg ti panangipaay ti panawen a makisarita kadagiti ubbing ken agawid nu adda gundaway tapno agtalinaed ti nasayaat a relasyon ken saan da a panunuten a mabaybay-an dagitoy.
Kinunana a simple laeng ti selebrasyon da iti Mother’s Day ita nga aldaw ti Domingo, Mayo 10, a mangan da laeng iti uneg ti pagtaengan a kaduada ti tallo nga annakda—dua a babbae ken maysa a lalaki.
Iti laksid ti amin a napasaranna, mensahe na kadagiti annakna— itultuloy da latta iti biag, naragsak a pamilya, ken namnamaenna a nasaysayaat ti biag dagitoy kumpara kadagiti rigat a napasaranna.
