Rinambakan ti Provincial Government of La Union (PGLU) iti Pride Month ita nga aldaw, Hunyo 28, 2026 idiay SM City kas paset iti inisiatiba ti Provincial Youth, Education and Sports Development Office (PYESDO) nga indauluan ni Macky Ducusin, ken pinasetan dagiti opisial, empleyado ti PGLU, agtutubo, ken nadumaduma a sektor iti probinsia.
Nagbalin a namaris iti panagtitipon dagiti umili ken komunidad dagiti LGBTQIA+ ti probinsia babaen ti tema a “Maris ti Panagkaysa”.
Kabayatan ti programa, inwaragawag ni Committee Chairperson on Women, Responsible Parenthood, and Gender and Development, Board Member Chary P. Nisce iti maipapan kadagiti ordinansa ken programa para iti LGBTQIA+ community, kinapateg ti panangawat ken panagraem iti bukod nga identidad.
Nangipeksa met ti suporta ni Governor Mario Eduardo C. Ortega iti aktibidad ken iti kinapateg ti “Agkaysa”, nga iti kaanuman ket saan a basaran iti katatao tapno maka-ambag ti kinasayaat ken panagrang-ay ti komunidad.
Paset iti programa iti Pride March, Symposium a nakatalantanan iti Sexual Orientation, Gender Identity, and Expression (SOGIE), Make-up Competition (Bridal ken Creative Categories), ken Volleybeks: One Day League Competition.
Ipanpaneknek ti nasao nga aktibidad nga iti pudno a panagdur-as ket magun-od laeng no adda ti waywaya iti tunggal maysa iti kinatao da.###
