Ibilang ti Philippine National Police a nakappia ken naballigi iti Traslacion ti Poong Jesus Nazareno ita a tawen.
Segun ken ni National Capital Region Police Office Chief Major General Anthony Aberin, maibaga a ‘generally peaceful’ iti pakabuklan a selebrasion ti piesta, maibasar iti ‘initial assessment’.
Gapu iti daytoy ket binigbig ken kinablaawanna iti kapulisan gapu iti naballigi a pannakaipatungpal ti akemda iti Traslacion.
Iti laksid dagiti karit ken iti nagdalanan ti napaut a prosesion, naragsakan isuna iti pannakaisubli ti imahe ti Poon idiay Quiapo Church.
Inaklon ti nasao nga opisial a narigatan dagiti kameng ti pulisya a nangguyod iti andas kalpasan a simmadsad daytoy iti kalsada.
Positibo met nga imbinglayna nga awan ti nadagsen wenno major crime incident a napasamak kabayatan iti panagbalin a makumikom ti amin iti panagrambak.
Iti pakasaritaan ti prosesion, ita a tawen iti maibilang a kapautan wenno kaatiddogan a traslacion kalpasan a dimmanon ti 30 nga oras ken 50 a minuto sakbay a nakasubli iti andas iti simbaan.###
