BR LA UNION – Naballigi a naisubli iti uneg ti Minor Basilica ken National Shrine ti imahe ni Jesus Nazareno ken andas ti Poon ita nga aldaw.
Sumagmamano a minuto sakbay ti alas onse ti bigat, naan-anay a naiserrek ti imahe ti Nazareno iti Simbaan idiay Quiapo, senyales a nalpasen ti Traslacion 2026.
Iti pakasaritaan ti prusisyon, daytoy ti maibilang a kaatiddogan ken kabagayan a Traslacion.
Manipud idi nangrugi idi kalman, Enero 9 idiay Quirino Grandstand, oras ti alas 4:00 ti parbangon, umabot ti 30 nga oras ken 50 a minuto sakbay a nakasubli iti simbaan.
Iti napalabas a rekord, naartapan na daytoy ti 22 nga oras idi tawen 2012 ken 2017.
Idi nagsubli ti Poong Jesus Nazareno, naragsakan dagiti deboto a naanus a naguray iti simbaan.
Segun kenni Rev. Fr. Robert Arellano, iti Parochial Vicar ti Quiapo Church, ti maysa a nangpa-bayag iti Traslacion ket iti panag-sagpat dagiti deboto iti andas.
Dayty ket laksid iti panawagan ti simbaan a lapdan ken ipawil iti sumagpat wenno umuli ken tumpuak iti andas ti Poon.
Innayon pay ti nasao a padi, malaksid a saan a kayat ti agpa-atipa dagiti deboto iti andas, maysa pay a kangrunaan a makagapo nu apay a nagpaut ti Traslacion ket iti panagsinnabat iti ruta a nagna-an ti prusisyon.
Adda ngamin ti sumagmamano a grupo nga imbes nga agpa-likod, sumabat da pay laeng iti sango ti andas ti Poon, isunga narigatan daytoy nga aggunay.
Kabayatanna, impakaammo ti lokal a gobyerno nga umabot ti aganay 9.6 million a devotees ti nakipaset iti Traslacion: Feast of Jesus Nazareno idi Biyernes agingga bigat ti Sabado.
