BR LA UNION – Binalakadan ti Department of Health (DOH) dagiti deboto ita a Holy Week a saan a kasapolan a saktan iti bagi iti panag-penitensiya kas iti panagpalansa iti krus ken panang-saplit ti likod wenno self-flagellation.
Iti maysa nga interview, kinuna ni Health spokesperson Assistant Secretary Albert Domingo a saan a kasapolan a dangran wenno saktan ti bagi maiyannurot iti balakad dagiti papadi.
Nu saan man a maliklikan, pinalagipan ti opisyal dagiti deboto nga agusar laeng kadagiti banag a na-sanitize wenno agusar ti antiseptic kas ti iodine tapno maliklikan ti impeksiyon ken ugasan a naimbag dagiti sugat babaen ti sabon ken nadalus danum.
Inlanad pay ti opisyal a dagiti sugat iti bagi ti penitensiya ket maaw-awagan a “dirty wound”.
Mabalin ngamin a pagtaudan ti mikrobiyo ti tapok iti daga ken dagiti us-usaren iti panag-penitensiya.
Balakad pay ti DOH official a saan tumapog iti karayan wenno iti baybay ken dalusan a dgus iti sugat.
Inaramid ti ahensiya ti pammalagip kagiddan ti tinawen a tradisyon ti kaadwan a deboto a Katoliko tapno ipakita ti panagbabawi kadagiti basol ken lagipen iti sakripisyo ni Apo HesuKristo babaen iti panag-palansa iti krus ken panang-saplit ti likod, a maisay-sayangkat tunggal Huwebes Santo ken Biyernes Santo.
