BR LA UNION – Inallokoy ti Catholic Bishops’ Conference of the Philippines (CBCP) dagiti matalek wenno devotee nga agsuot ti puraw a kawes tunggal Domingo ita a bulan ti Oktubre ken inton Nobyembre.
Impaganetget ti CBCP nga iti kallabes nga aldaw, napasaran ti pagilian ti agsasaruno a nakaam-amak a didigra kas iti bagyo, panagbettak ti bulkan, uram, ken ginggined.
Gapu iti daytoy, impaganetget ti CBCP ti panawaganna iti publiko a makipaset iti National Call to Prayer and Public Repentance ken aramiden daytoy ti tunggal lawas wenno Domingo, ken no mabalin, ituloy agingga iti Solemnity of Christ the King.
Inallokoy pay ti CBCP dagiti mamati ken matalek a mangikabil iti puraw a laso wenno ribbon kadagiti pagtaengan, simbaan, ken dadduma pay a pampubliko a lugar.
Daytoy ket panangipakita ti tarigagay ti tunggal maysa a silulukat, reponsable ken nasayaat a panagturay.
Daytoy ket wagas a kararag para iti pannakadalus ti pagilian ken pannakaisalakanna manipud iti agsasaruno a didigra, ken tapno dumawat iti asi ti Diyos.
Mangnamnama ti CBCP a daytoy a panawen ti kararag ken panagbabawi ket mangipaay iti baro a namnama, pannakaagas, ken pannakaisubli ti panagtalek iti kaadda ti kinapudno ken hustisiya.
Segun iti Simbaan, agserbi ti panagisuot iti puraw a kawes a kas simbolo ti kinasin-aw ken kinadalus ti puso ti tunggal indibidual ken ti nasyon.
