BR LA UNION – Nakasaganan ti Philippine National Police (PNP) para iti Traslacion inton bigat a manamnama a dar-ayan ti minilyon a deboto ni Poong Hesus Nazareno.
Segun kenni Acting PNP Chief PLtGen. Jose Melencio Nartatez Jr., kompleto ken naan-anay ti puwersa a mangipatugpal ti seguridad para iti nasao a selebrasyon ken nakasaganada metten a mangipatungpal iti anyaman a panagbalbaliw no makita da a kasapulan.
Immunan a naimuntar dagiti puwersa ti pulisiya idiay Quirino Grandstand gaputi posible a panagdopodop dagiti deboto inton rabii, nga isuti maudi nga aldaw a panangipaay iti panagraem wenno panangagek iti Poon.
Bayat a nakapuwesto metten ti sumagmamano pay a puwersa idiay Quiapo Church para iti nakatuding a misa inton bigat wenno parbangon sakbay ti mismo a prusisyon.
Malaksid dayta, nakamuntar metten dagiti plainclothes police ken intelligence units tapno malapdan dagiti insidente kas iti panagtakaw ken dadduma pay a klase ti pananggundaway.
Kabayatanna, nangikabil pay ti pulisya kadagiti police assistance desks tapno maipaayan ti tulong ken assistance dagiti agkasapulan a deboto kas dagiti senior citizens, persons with disabilities ken dadduma pay a priority citizens.
