Nakasaganan ti Department of Health (DOH) para iti pannakaisayangkat ti Traslacion 2026.
Daytoy ket tapno masigurado iti kinatalged ken nasayaat salun-at dagiti deboto a makipaset iti prusision.
Segun kenni Health Secretary Ted Herbosa, mabukel ti nasurok 200 Health Emergency Response Teams manipud kadagiti naduma-duma nga DOH hospitals kas panagsagana.
Maiwaras dagiti nasao a grupo iti kawatiwatan ti ruta ti prusision tapno napartak iti pannakaipaay ti serbisio medikal kadagiti agkasapulan.
Impalagip ni Secretary Herbosa iti publiko nga agsagana ken mangitugot ti maintenance medicine kangrunaan dagiti addaan ti kondision ken dagiti nataengan.
Napateg met a mangitugot ti umdas a danom tapno mapagtalinaed nga hydrated, taraon tapno adda ti makan iti panawen ti prusision, ken komportable a bado tapno saan a marigatan iti pannagna.
Inallukoy pay ti sekretario iti amin nga ammuen iti lokasion ti kaasekgan a medical station tapno napartak iti pannakakiddaw ti tulong no kasapulan.
Immunan nga impakaammo ti Quiapo Church iti publiko nga adda dagiti kalsada a temporario a maipasirra tapno ikkan-dalan dagiti medical team ken dadduma pay nga emergency personnel a sumungbat iti aniaman nga insidente wenno pagkasapulan ti medikal nga atension.###
