BR LA UNION – Kinumpirma ti International Criminal Court (ICC) a karaman itan ni Senador Ronald dela Rosa iti opisyal a listaan da kadagiti “wanted persons,” maibasar iti website ti korte idi rabii ti Miyerkules, Mayo 13.
Segun iti ICC, ni Dela Rosa ket kabilang itan kadagiti 33 nga akusado a maibil-bilang nga “at large.”
Iti profile na iti website ti ICC, nakailanad ti sibubukel a naganna a Ronald Marapon Dela Rosa, agraman ti petsa ken lugar a nakaiyanakanna.
Inladawan pay ti ICC ni dela Rosa kas maysa a sigud nga opisyal ti Philippine National Police (PNP) a nagiggem ti naduma-duma a posisyon idiay Davao region, nagbalin a hepe ti PNP, ken nagserbi a Director General ti Bureau of Corrections iti panawen a sakop ti kaso.
Nakailanad pay iti profile, a ti arrest warrant kontra kenkuana ket naiyetnag a “secret” idi Nobyembre 6, 2025 ken naisapubliko laeng idi Mayo 11, 2026.
Iti laksid ti status ti senador, maur-uray latta ti petisyon na iti Supreme Court nu anya ti agbalin a desisyon ti korte kalpasan a saan a napatgan ti kidkiddawen na a temporary restraining order seknan iti arrest warrant ti ICC.
