BR LA UNION – Suk-sukimaten ken nainget a banbantayan ti gobyerno ti Pilipinas iti report seknan dagiti maipagarop a baro nga istruktura idiay Bajo de Masinloc (Scarborough Shoal).
Segun kenni Defense Secretary Gilberto Teodoro Jr., agtaltalinaed a “dynamic” wenno napaspas nga agbaliw iti sitwasyon iti rehiyon.
Nupay babassit pay laeng dagiti aktibidad sadiay, agtultuloy ti panagbantay ti gobyerno ti Pilipinas.
Maipalagip a sipud pay idi tawen 2012, iggemen wenno kinontrol ti China iti shoal laksid iti agraraira a 2016 ruling, a nangwaswas ti Permanent Court of Arbitration iti nalawa a “9-dash line” claim ti China.
Naideklara metten ti shoal kas maysa a traditional fishing ground a rumbeng a nawaya a makaserrek dagiti mangngalap.
Masarakan ti shoal iti kaadayu a 124 nautical miles manipud idiay Zambales, nalawag nga adda iti uneg ti 200-nautical mile Exclusive Economic Zone (EEZ) ti Pilipinas.
