BR LA UNION – Inaklon ni Eileen Wang, sigud a mayor idiay Arcadia, California, a limed a nagtignay kas ahente ti China tapno agisaknap ti propaganda.
Segun kadagiti imbestigador, ni Wang kadwa ti sigud a fiancé na ket nangimanehar ti website a naglaun kadagiti artikulo nga aprubado ti gobyerno ti People’s Republic of China.
Inaklon ni Wang a nakaawat isuna iti direktiba manipud kadagiti opisyal ti People’s Republic of China ken nag-post ti artikulo wenno impormasyon ngem awan ti source wenno nagtaudanna.
Ti nasao a website ket nagparang kas gagangay a news site ngem nalaokan ti propaganda a makalus-lusot iti komunidad.
Ni Wang, a nabotosan idiay Arcadia City Council idi 2022, ket naglosolos iti posisyon na kalpasan a rimwar ti kaso.
Nakatuding a makedngan inton Oktubre 6, 2026 ken posible a mabalud ti agingga 10 a tawen.
Segun iti FBI, ti panangaklonna ket nalawag a ballaag kontra kadagiti agtigtignay para iti gangannaet a gobyerno tapno impluwensiyaan iti demokrasya ti Amerika.
