BR LA UNION – Umaboten iti 31 a tattao bayat a nasurok maysa dosena iti mapukpukaw kalpasan a timmama iti napigsa a magnitude 7.8 a gingined idiay Sarangani itay agsapa ti Lunes, Hunyo 8, 2026.
Nasurok 130 a tattao dagiti nasugatan segun kadagiti provincial authorities, bayat nga agtuloy iti search and rescue operations kadagiti kangrunaan nga apektado a lugar.
Segun iti Philippine Institute of Volcanology and Seismology, alas-7:37 itay agsapa a timmama ti napigsa a gingined idiay ili ti Maasim, Sarangani. Naggapo daytoy iti panaggaraw ti Cotabato Trench.
Kabayatanna, siyam a tattao ti naipadamag a natay idiay General Santos City.
Agtultuloy ti panagkali dagiti rescuer iti maysa a narsuod a grocery store idiay General Santos City a mapapati a nakagaburan ti sumagmamano nga empleyado.
Segun kadagiti opisyal, dakkel a karit iti agdama iti kaawan ti kuryente ken komunikasyon iti sumagmamano a lugar isunga marigatan da a makaala ti kumpleto nga impormasyon seknan iti kalawa ti perdisyon.
Kadagiti video a nagwaras iti social media, makita ti pannakarpuog ti maysa a shopping center a pakairamanan ti fast-food restaurant.
Narsuod pay ti maysa a pasdek pagadalan, ngem awan ti tao iti uneg idi mapasamak ti panagdayyeg.
Iti maysa pay a video, makita nga inarakop dagiti mangisursuro dagiti ubbing nga estudyante bayat ti napigsa a panaggun-gon ti daga gapwanan ti napigsa a gingined.
Nasurok 2,000 a residente ti naiyakar gaputi pangta ti tsunami kalpasan ti gingined.
Ngem idi agangay ket naibabawi met laeng ti tsunami warning ditoy Pilipinas ken dadduma pay a kaasideg a pagilian.
Agtaltalinaed a naannad dagiti otoridad ken agtultuloy a maam-amiris nu natalged nga agsubli iti babbbalay da dagiti immakar a residente.
Gaputi kalamidad, nasuspinde iti umuna koma nga aldaw ti klase, iti intero a Mindanao.
Temporaryo a nairikep iti General Santos Airport kalpasan a nakitaan ti perdisyon iti sumagmamano a paset ti terminal building.
