BR LA UNION – Awan ti makitkita a constitutional crisis iti Malacañang laksid ti agtultuloy a susik iti liderato ti Senado.
Daytoy ti imbaga ni Palace Press Officer Claire Castro kalpasan a masalodsod nu posible nga agbanag iti constitutional crisis ti innagaw iti liderato ti nangato a pagpandayan linteg ti kongreso, nangruna iti isyu ti special session ken impeachment trial.
Segun kenni Castro, nalawag iti takder ti ehekutibo a ni Acting Senate President Win Gatchalian iti bigbigen na a lider ti Senado.
Kinuna pay ti opisyal nga anyaman a posible a problema iti panangipatungpal dagiti trabaho ti Senado ket isyu ti nangato a pagpandayan linteg, saan ketdi nga ehekutibo.
Innayon na pay, saan a rumbeng nga adda susik iti liderato ti Senado ken rumbeng nga awaten ti bangir a kampo iti panangbigbig ti agdama a liderato.
Kasaruno daytoy ti agtultuloy a panagsinnupyat ti agsumbangir a kampo nu siasino iti lehitimo a lider ti Senado ken nu siasino ti rumbeng a mangidaulo dagiti opisyal a trabaho ti nangato a pagpandayan linteg.
Kabayatanna, tarigagay ni Presidente Marcos nga agtinnunos nga umuna ken urnosen dagiti senador iti saan a panagkikinna-awatan sakbay a mangisayangkat ti anyaman a pormal a panagtataripnong wenno interbensyon iti Ehekutibo.
Segun kenni Palace Press Officer Usec Claire Castro, matagi-awan laeng ti plano a panagpa-ayab ti Presidente ti maysa nga special session nu agtultuloy ti riribok ken awan ti panagkaykaysa dagiti miyembro idiay senado.
Impaganetget ti Palasyo a rumbeng a pagimbagan ti publiko ti agpannuray ken saan a ti personal nga interes dagiti mammanday linteg iti tengnga ti mapaspasamak nga innagaw iti liderato ti Senado.
