BR LA UNION – Kampante ni Department of Public Works and Highways (DPWH) Secretary Vince Dizon a nadagsen dagiti ebidensiya a maisango kontra kenni presidential cousin, Leyte Rep. Martin Romualdez.
Ii maysa nga interview, nasalodsod ti sekretaryo nu apay nga awan apay ti aktwal a kaso kontra kenni Romualdez laksid ti panangdakamat kenkuana ti sumagmamano a resource person iti panagdengngeg idiay Senado ken iti House of Representative.
Segun kenni Dizon, magmagna ti legal a proseso kontra kenni Romualdez ken sigurado nga iti kabiitan a panawen ket maidatagen idiay korte, partikular iti Sandiganbayan.
Kampante ti sekretaryo iti kadagsen dagiti ebidensiya a maisango kontra iti sigud a House leader a segun kenkuana, isuna mismo ti nagrefer ken nagsumite idiay Office of the Ombudsman. Napasamak daytoy idi November 30, 2025.
Segun kenni Dizon, dagiti nasao nga ebidensiya iti nagserbi a dalan tapno mangirwar ti freeze order ti korte kadagiti sanikua ti presidential cousin ken naan-anay a napawilan a makarwar iti pagilian.
Impaganetget ti sekretaryo a nupay adu dagiti agtarigagay a makita a makaswan wenno maibalud iti sigud nga House leader, ngem kasapolan kunana a dumalan iti umno a proseso iti maidatag a kaso, kas ti dimmalanan iti kaso da Sen. Jinggoy Estrada ken dadduma pay a nakabalud itan gaputi anomalya iti flood control projects.
Maipalgip a ni Romualdez iti nagserbi nga Speaker of the House idi mabukel ti 2025 National Budget a maibilang kas maysa a pinaka-corrupt a national budget, gapu kadagiti maipagarop nga illegal insertions.
Nagserbi pay idi kas House Appropriations Committee chair ni Zaldy Co, a sumangsango ita ti agtutuon a kaso gaputi pannakairaman ti kompaniya na a Sunwest Corporation iti ghost flood control project.
