BR LA UNION – Nangisayangkat ti media forum iti Department of Environment and Natural Resources Regional Office 1 idi kalman, Hunyo 15,2026 kas paset ti pannakarambak iti Philippine Environment Month nga addaan ti tema a “Climate Action: Fostering Community Spirit, Caring for the Environment.”
Nagbinnulig ti Department of Environment and Natural Resources Regional Office 1, Iti Mines and Geosciences Bureau ken Environmental Management Bureau, tapno pagsaritaan dagiti napateg nga isyu maipapan iti panangsalaknib ti aglawlaw, panangsango dagiti epekto ti climate change, ken ti papel ti tunggal umili iti panangitandudo ti natalged, napigsa ken naberde a masakbayan.
Segun kenni Engr. Carlos A. Tayag, Regional Director, CESO V ti Mines and Geosciences Bureau Region 1, masapul ti nauneg a panagtitinnulong dagiti ahensya ti gobyerno, local government units, Philippine National Police, barangay officials ken publiko tapno mas epektibo a labanan ti illegal mining iti rehiyon uno.
Impalawag ni Regional Director Engr. Tayag a saan a kabaelan ti ahensya a mabantayan 24/7 kada aldaw ti amin a paset ti rehiyon, nangruna ket uppat dagiti probinsiya a sakupen daytoy.
Gapuna, agtultuloy ti panangipakaammo ken panangikampanya da kadagiti lokal nga opisial ken law enforcement agencies a tumulong iti pannakaipasardeng dagiti iligal nga operasyon nangruna ti illigal a panagminas.
