BR LA UNION – Dua nga ili ditoy probinsiya ti La Union iti nabunongan ti essential relief goods ken emergency supplies idi Hunyo 15, 2026 babaen ti gobyerno probinsiyal ti La Union.
Paset daytoy iti agtultuloy a panangpapigsa ti kinasagana dagiti lokal a gobyerno iti panawen ti kalamidad ken dadduma pay a didigra.
Babaen iti panangidaulo ni Gobernador Mario Eduardo C. Ortega kadwa na ti Provincial Disaster Risk Reduction and Management Office (PDRRMO), nangibunong dagitoy iti food and non food items iti ili a Bacnotan ken Luna tapno masigurado nga adda madadaan nga usaren no panawen ti emerhensiya.
Kabilang dagiti naipaay ket ti naduma-duma a food ken non-food items, kas emergency shelter materials, hygiene kits, stackable storage boxes, pagidulinan iti nadalus a danum, bottled water, sabon, Food Packs ken dadduma a kangrunaan nga arwaten a mabalin a mausar dagiti maapektaran a pamilya iti panawen ti didigra.
Dagiti relief supplies ket mainayon iti stockpile ti Municipal Disaster Risk Reduction and Management Office (MDRRMO) ti ili a Bacnotan ken Luna tapno masiguro nga adda nakasagana ken napartak a panagresponde ti lokal a a gobyerno iti panawen ti krisis a mabalin a mapasaran ti ili.
Dagus met a nangidanon ti panagyaman da Mayor Divine Fontanilla ken Mayor Gary Pingson iti provincial government iti agtultuloy a suporta, tapno mapapigsa ti disaster preparedness ken masiguro ti kinatalged dagiti umili nu adda ti didigra.
Babaen ti adbokasia ti “La Union: Agkaysa!”, agtultuloy nga itandudo ti probinsia ti panagkaykaysa ken panagsagana tapno masigurado nga agtalinaed a natalged, natibker, ken nakasagana iti komunidad iti sango ti anyaman a karit ken didigra.
