BR LA UNION – Dakkel ti agbalin nga epekto ti surprise rally idiay EDSA, saan laeng nga iti gobyerno ngem uray pay kadagiti mangmangged, estudyante, pasyente ken negosyo a naapektaran iti panagirut ti taray ti trapiko idiay EDSA.
Daytoy iti inwaragawag ni Palace Press Officer USec. Claire Castro.
Impaganetget ni USec. Castro a nasken nga adda permit ken koordinasyon iti gobyerno dagiti rally tapno makapagsagana kadagiti kasapolan a traffic ken safety measures.
Segun kenni Castro, marespeto ti karbengan dagiti umili nga agprotesta, maiyannurot laketdi iti linteg.
Imbatad ti Malacañang nga i-respeto ti administrasyon iti karbengan dagiti umili a mangipeksa ken agprotesta, ngem saan a rumbeng a malabsing ti linteg wenno ma-istorbo iti publiko.
Kinuna pay ni Castro nga awan ti makita a pangta ti Malacañang manipud iti protesta, ngem agtultuloy nga imon-monitor ti Presidente iti sitwasyon gaputi epekto na iti trapiko ken kadagiti motorista, mangmangged, estudyante ken pasyente nga aglabas idiay EDSA.
Segun pay kenni USec. Castro, dakkel a pannakasinga ti kellat a rally gaputa maipagarop nga awanan ti permit ken saan a naipaka-ammo daytoy iti gobyerno, isunga awan ti naan-anay a panagsagana para iti traffic management.
Kinuna na a maim-imbestigaran metten ti anyaman a posible a panaglabsing iti linteg ken pagsungbaten dagiti responsable nu kasapolan.
