Inpangato ti World Bank ti Pilipinas iti upper-middle-income economy, maibasar kadagiti kaudian nga income classification ti pagilian a nairuar idi Hulio 1.
Segun ti World Bank, dumanon ti $4,850 iti gross national income (GNI) ti pagilian idi 2025, a limmabes iti $4,636 a threshold para kadagiti upper-middle-income economies.
Karaman ti Pilipinas kadagiti innem a pagilian a simmang-at iti higher income category iti kaudian nga update.
Nupay kasta, inlawlawag ti World Bank a ti baro a klasipikasion ket mangipakita iti pakabuklan a panagdur-as ti ekonomia ken saan a kaipapan a kaaduan kadagiti Pilipino ket middle class wenno nasolbar dagiti isyu ti kinapanglaw, saan a panagpapada, nababa a sueldo ken nangato a gastos iti panagbiag.
Dagiti napabaro nga income classifications ti World Bank ket agtalinaed a basaran aginggana iti ngudo ti Hunio 2027.
