Pinaregta ni Senador Robin Padilla iti publiko nga agbalin a nasiput kadagiti mapaspasamak ditoy pagilian iti panagbitlana iti maikatlo nga aldaw ti Iglesia ni Cristo peace rally iti Liwasang Bonifacio idiay Manila idi kalman.
Dinakamatna pay a mabalin a makasuan isuna ti obstruction of justice mainaig iti maipagarup a panangtulongna kenni Senador Ronald “Bato” dela Rosa a makaliklik iti kustodia ti Senado idi Mayo 14.
Segun kenni Padilla, posible met a mangipaulog ti International Criminal Court (ICC) iti arrest warrant kontra kenkuana.
Nupay kasta, immunan a kinuna ni ICC-accredited Assistant to Counsel Kristina Conti nga awan pakainaiganna iti international tribunal ti aniaman a liability ni Padilla iti pagilian.
Pinaregta met ti senador iti publiko a saan nga agulimek kadagiti isyu a sangsanguen ti pagilian ken inpaganetget nga agtultuloy daytoy nga agsao para kadagiti Pilipino.###
