Ramrambakan ti Bombo Radyo Philippines ita nga aldaw iti historiko a maika-60 nga anibersario, innem a dekada nga awan sarday a panagserbi iti umili a Pilipino babaen ti napudno, napartak, ken mapagtalkan a damag.
Manipud idi naipasdek idi Hulio 6, 1966 babaen ti visionary founder a ni Don Marcelino M. Florete Sr. ken iti agdama a panangidaulo ni Dr. Rogelio M. Florete, Chairman ti Bombo Radyo Philippines, dimmakkel ti Bombo Radyo manipud iti maysa nga estasion agingga iti MOST STABLE and MOST RELIABLE radio network iti pagilian. Iti agdama, addaan daytoy ti 32 a fully digitized AM ken FM stations iti 25 a kangrunaan a lokasion iti intero a Pilipinas.
Iti innem a dekada, napateg a paset ti biag dagiti minilion a Pilipino ti Bombo Radyo. Iti panawen ti didigra, eleksion, krisis ti pagilian, ken uray kadagiti kanito ti panagrambak, agtalinaed daytoy a kangrunaan a pagalaan ti damag, impormasion, komentaryo, ken serbisio publiko.
Nalablabes pay iti broadcasting, agtultuloy iti panangitandudo ti network kadagiti programa a mangipaay ti direkta a serbisio kadagiti umili kas iti Bombo MEDICO – ti medical, dental ken optical program, DUGONG BOMBO – ti nationwide blood letting campaign, ken BOMBO MUSIC FESTIVAL a mangitantandudo iti Original Pilipino Music.
Mabigbig met ti Bombo Radyo Philippines babaen kadagiti nadumaduma nga institusion gapu iti kinalaingna iti journalism. Karaman ditoy ti nominasion ti Bombo Network News kas Best News Program babaen ti Catholic Mass Media Awards idi 2024 ken 2025, kasta met ti pannakabigbig kas Radio Network of the Year babaen ti Rotary Club of Manila iti 2026 Pro Patria Journalism Awards.
Iti panangrambak ti maika-60 nga anibersario, patalgedan ti Bombo Radyo Philippines ti panagkumit nga agtalinaed a numero uno ken mapagtalkan a pagtaudan ti damag ken impormasion – agtultuloy a mangitandudo iti balanse a komentaryo, patas a panangipadamag, ken addaan kaipapanan a serbisio publiko para iti tunggal Pilipino.
Iti innem a pulo a tawen, maymaysa a nagan iti nagtalinaed kadagiti umili – ti Bombo Radyo Philippines. Maysa a nagan a pudno a nagbalin nga A Way of Life para kadagiti Pilipino.
BASTA RADYO… BOMBO!
